’Ā’ai nō Maui o tei mārei ia Rā

Hō’ē teie o te mau ’ā’ai rahi roa a’e i roto i te ’āpapara’a ’ā’ai mā’ohi. ’Ua mārei ’o Maui i te rā e te hō’ē ’ūpe’a nō te fa’ataere ri’i mai i tōna tere ’ia ’ama te i’a a te mau ta’ata rava’ai.

I te rahura’ahia i te ao, ’ua mana’o ’o Rā ē, ’ōna ana’e teie e ha’a nei. Tē māta’ita’i ’e tē hia’ai nei ’oia i te orara’a o te mau ta’ata e ta’oto noa ra… ’Ōpua atu ra te mahana e ’āpe’e ia rātou. Nā’ō a’e ra :« E pa’i, e atua vau ». « E tīa’i mai te mau ta’ata iā’u, e nehenehe ïa vau e rave i tō’u hina’aro ! »

I te mau mahana i muri, e ti’a taere mai ’oia ’e tau miniti noa i muri iho, topa ’oia i muri ia Mo’orea, nō te tahi pō roa mau. Pō roa ho’i, tē hepohepo nei te Fenua. ’Aita atu ra e taime fa’ahou nō te fa’aineine i te ahimā’a.

’Ua ’oru’oru te ’utu o te vahine  a Maui , ’o Hina, i te ’ai-ota-noa-ra’a i tāna mā’a. ’Aita roa atu ’o Maui i māuruuru i te ravera’a a te mahana. ’Ōpua a’e ra e ’aro iāna.

Haere atu ra ’o Maui e ti’i mai i te hō’ē ruru pōhue, e mau remu rōroa ’e te mau pa’a rā’au pa’ari roa a’e. I tōna fa’aotira’a i te ha’aputu i teie mau rā’au, firi atu ra i te tahi ’ūpe’a, hō’ē a’e firira’a i te mau pōhue, te mau remu, te mau pa’a rā’au ato’a ’e te hō’ē io rouru ’o Hina.

I te ao, e rohi ’oia i te mārama o te rā, i te pō, e rohi ’oia i te ’anapa o te mau feti’a. ’Eie ïa te rā e tere pe’epe’e noa nei i roto i te ra’i, tē rahi noa ra te ’ūpe’a.

’Ua oti te ’ūpe’a. Tīa’i noa atu ra ’o Maui ia Rā i pīha’i iho i te ’āpo’o nā reira ‘ōna e fā mai ai. ’Ua toro mai te hihi o te Rā o tei ha’amāramarama i te mau ’are ’e te mau ata. Tē puai noa atu ra. ’Ua ’oto te ta’i o te mau manu. Tā’ue atu ra ’o Maui i tāna ’ūpe’a o tei tāpo’i i te ’āpo’o.

’Ua here te mahana. ’Ua pau te ’ōu’au’a  a Rā na roto i te ra’i , ’aita iho ā e rave’a, ’aita te ’ūpe’a a Maui i mutumutu a’e.

I reira, fa’aahu atu ra te mahana iā na , ’ua piha’a te miti, ’ua tavavā te fenua, ’ua pa’apa’a te mau taura ato’a o te ’ūpe’a. Remu, pohue, pa’a rā’au ;’aita rā tō Hina rouru. ‘Ua rohirohi roa o Rā.

I reira tō Maui tāpirira’a atu :
– Nā’u, Maui , i mārei i te rā.
E reo maru roa tō Rā i te anira’a :
-’A tu’u iā’u , e Maui.
-’Aita ïa. E vai mau noa ’oe nō tō’oe ’ino i ni’a i tā’u vahine ’e tā’u nūna’a. ’Ua pa’apa’a tō ratou ’utu i te tāpau ota ’e ’ua ’ī tō ratou mata i te pōiri. E vai mau noa ’oe !
-E Maui , mai te peu ’aita ’oe e tu’u iā’u , e mate au , ’e ’aita ato’a outou e ora ! ’A tu’u iā’u !
-Nā mua roa, ’a ’euhe mai e ’ama tā mātou i’a ’e te mā’a tupu hou a pōiri ai !
-Tē ‘euhe nei au !

Tu’u atu ra ’o Maui i te mahana ’o te pe’e i ni’a i te ra’i.

Mai reira tō Rā ti’a ’oi’oira’a ’e tōna ta’oto taerera’a. I te tahi mau taime, ’ia hi’ohia te topara’a mahana, e ’itehia te tahi ’ūpe’a iti matie : te rouru ïa ’o Hina tē rī i reira ’ia ’ore te mahana e ha’amo’e i tāna ’euhe…

‘Ā’ai nā roto i te reo farāni : Légende de Maui qui attrape le soleil