‘Ā’ai nō te mou’a Pahia i Pora Pora

E piti tara mou’a i Pora Pora,‘o ‘Otemanu te mou’a teitei roa a’e, e fāito ‘oia e 727 mētera ‘e ‘o Pahia te tahi, e fāito ‘oia e 661 mētera. E mea au ‘ia pi’ihia te mou’a Pahia, ‘o Pa’ihia ‘oia ho’i nā roto i te reo farāni « qui a été frappé »

Mai te ‘ā’ai, ‘ua tere e piti ‘aito nō Tahiti i Pora Pora nō te ‘eiā i te mou’a Pahia.
I ni’a i te motu To’opua i Pora Pora (te vāhi i reira te oe a Hiro), tē ora ra te ‘aito nui ‘o Hiro ‘e tōna tamaiti ‘o Marama.
‘E i roto i te hō’ē ana o te mou’a, tē ti’a noa mai ra te moa a Marama. ‘Ua ‘ite ‘oia i na ‘aito e piri mai ra ‘e ‘ua hīmene pūai ‘oia nō te fa’aara i te pe’ape’a a tōna fatu. I muri mai, ‘ua riri roa na ‘aito i terā moa nō te mea ē, ‘ua ‘itehia rāua ‘e ‘ua ha’apohe atura rāua i te moa.
‘Ite atura ‘o Marama i te pohera’a ‘o tāna moa ‘e ‘ua pa’i ha’apūai ‘oia i te mou’a. ‘Ua taparūrū roa te mou’a ‘e ‘ua topa te mau ‘aito i Matira, riro mai nei rāua ‘ei motu : Piti-uu-tai ‘e Piti-uu-uta.

‘Ua pi’ihia teie mou’a ‘O Pa’i-a-Marama ‘oia ho’i nā roto i te reo farāni « la frappe de Marama » ‘e ‘ua mono ‘oia te i’oa tahito Te-tara-o-pa’ia (Pa’ia, l’épine).

Tē vai ra hō’ē ana rahi i te taha o te mou’a Pahia i roto i te mato, o tei ‘itehia nā te pūrumu. Mai te tahi parau o te mau tupuna, e fāito teie ana 25 mētera ‘e e nehenehe tātou e ‘ite i te mau vini.
‘Ua parau te mau tupuna ē, e vāhi teie ana nō te mau vārua.

Te tahi mau ‘ā’ai nā roto i te reo tahiti i Pora Pora

‘Ā’ai nō Fa’eta, te ‘aito nui nō Anau

‘Ā’ai o te mau mahana hōpe’a a Ha’auri

‘Ā’ai nō Heitarauri, ti’a i ni’a i te tua o te ma’o